أكو محافظتين حبيبتين بالعراق ، وحده مشهوره بأكلة (الدولمة) ، والأخرى بأكلة (الفسنجون) ، وحتى ما أحرمكم من حلاوة أسمائهن ، هن (بغداد) و(النجف) .
- البغدادي يقول للنجفي : أكو واحد يأكل مرقة حلوة ؟ أجيبلك گيمر وياها !؟
- النجفي يرد : لا خو قشطة أحسن ، دشوف الدولمة مالتكم تگول دعاية مال علوة مخضر .
وما صارت لحظة صمت إلا بعدما سمعنا مصطلح (تاج راسك) ؟!! واحد يقول الدولمة تاج راسك ، والثاني يقول الفسنجون ، وصارت هوسه وما كلنا شي من وراهم .
كل هذا وهم يدبچون على تربة أحلى وطن بالدنية ، فوق أرض العراق العزيز .
ولحظات !!!! وإذا بالوطن يفز على حيله ، مثل أبو ومصيوب بخاصرته ، وبكل أدب سولف وياهم ، من إيديهم خذاهم مو من إذاناتهم :
(حبايبي ؛ آني أبوكم ، لتسمحون لأي شيء يفرقكم ، ورجاءاً تردون تيجان ؟ أحلى تاج ألبسكم .. لا توزعون تيجان بالي يصرفلكم .. تاجكم حب الوطن .. هو الذي يجمعكم) .
وهنا المخرج سوه الموسيقى حماسية حتى يصورلنا مشهد الگدور من تنخرط ؟!!
قصدي الحبايب من يتعانقون وأساريرهم تنبسط ..
ماكو داعي أصورلكم المشهد ..
مخرجنا بلا زحمة أقطع ..
ليش أكو واحد ينسه العراقي ويه أخوه شلون إيد بإيد وگلب على گلب .
هم نرجع نسولف قصة الاصدقاء الي كل واحد من دين ومذهب من راحو لحميد أبو التكة شصار وكت دفع الفلوس .
هذا العراق الي ملأ مكتبة الضمير بقصص المحبة والانسجام ، لتفلشون ماضيه بتحزبات وتكتلات ، واني من جماعة تاج راسك ، وانت من ربع فلان الي هو كذا.......
والخلاصة :
(١) شفتوا العراق ما شتم أولاده ، بالعكس بكل أدب سولف وياهم ، فخلونا نبطل الشتايم والغلط ، والإمام الباقر ع يقول : (سلاح اللئام قبيح الكلام) .
(٢) نحتاج نفكر منو الي يريد يفرق بين (الدولمة) و(الفسنجون) ويخلي كل أكلة بسفره ويطلعنا بلوشي .
ع فكرة كل إحترامي لأهل النجف وبغداد ، كانوا أبطال المشهد فقط ، فالكلام لنفسي ولكل غيور في الوطن .
(٣) منو يفرقنا ؟
- الدين يفرقنا ؟
لا وألف لا !! شوفوا ماضينا شحلاته ، وحسبوا كم ديانة بالعراق ولليوم .
- السياسة تفرقنا ؟
معقولة أبيع أخويه على حساب شي نمشي ونلعن بيه ليل ونهار ؟
صدگ خاف الطوبة تفرقنا ؟!!!
لنقرر (ماكو شي يفرقنا بعد اليوم) .
(٤) لا تقول (ما إلنه حل ولا يصير براسنه حظ) ؟!
أزحمك إرجع للحشد وشوف كل فرد بيه يحب رمز معين ، أو يهوى حزب ، لكن بالأخير الكل حس (إحنه عراقيين) وتوحدوا عندما جمعهم نداء الوطن والدين .
(٥) صدگ هم عرفتوا شصار وكت دفع الفلوس يم حميد أبو التُكة ؟!!
#لن_يفرقنا_أحد
#حملة_التكاتف
#تكاتفوا
لنبدأ من اليوم بتغيير أنفسنا ومن حولنا ، فلن يغير الله ما بقوم حتى يغيروا ما بأنفسهم .
نسخة منه للأحزاب ، وأرجو أن يكون بخط عريض أعلاه (لن يفرقنا أحد) .